الرئيسية » أهم الأخبار » الدكتور محمد الجزار يكتب: ما أتعسك أيها الطبيب المصري

الدكتور محمد الجزار يكتب: ما أتعسك أيها الطبيب المصري

الدكتور محمد الجزار

الحكومه رافعه عليك قضية عشان تفضل تقبض بدل عدوى 19 جنيها وماتترفعش ل 1000 جنيه

الحكومه رافعه عليك قضية عشان ماتساهمش فى مصاريف الدراسات العليا اللى وصلت 5000 جنيه سنوياً واللى بتفضل تعايرك بالتسجيل وبتقولك إنك فى بعثه!!

الحكومه بتعينك بعد التكليف ع الدرجة التالتة وتربط لك مرتب أساسي بتاع 200 جنيه والباقى كله حوافز عشان لو لعبت بديلك ماتلاقيش غير ال 200 جنيه فى وشك.

الحكومه بتنزلك حركة النيابات بمتطلبات وهميه زى مثلاً نيابة أطفال مبتسرين فى مستشفى مفيهاش حضانات أو تخصص علاج أورام فى مستشفى أبو زعبل العام.

الحكومه حتقعد تزولك ما بين ترشيح للماجستير وممكن ماتتقبلش وزمالة وممكن بردو ما تتقبلش وتقعد ياعينى عايز تتعلم بس لا فى نظام ولا تعليم.

الحكومه لو تم الإعتداء عليك أثناء عملك فى الإستقبال واتضربت واتمسح بكرامتك الأرض من شويه بلطجية حتتشد ع القسم زيك زى المجرم بالضبط وحتبات لتانى يوم تتعرض ع النيابة وحتتنازل عشان ما تتبهدلش.

الحكومة حتلعب كل شوية فى مستقبلك بقرارات متضاربه وتلغى ترقيات وتعدل أنظمة ولا أنت فاهم حاجة وأنت وحظك بقي القرار جاى معاك ولا ضدك.

الحكومه ولا عامله اعتبار للنقابة بتاعتك ونقابة الشيالين مع احترامى ليهم أكثر فعالية من نقابة الأطباء.

الحكومه لما حتى تجيب عقد وعايز تسافر بردو حتطلع عينك بس ساعتها باور القرف اللى أنت فيه حيفوق أى عقبات بيحطوها قصادك فمعلش استحمل.

الحكومة والبرلمان المصرى مركزين معاك خد بالك، وحاسين إن ممكن جروب يفلت ويبدأ يعمل فلوس. متخافش هم مش حيسبوك  وحيفضلوا وراك لحد ما يقلعوك ملط.

الحكومه بتحبك وعايزه تساعدك. بس هى مش قادرة. سمعت فين الكلامه ده مش فاكر!؟.

الدكتور محمد الجزار

أخصائي علاج الأورام – معهد ناصر

تعليقات الفيس بوك

تعليقات