الدكتور أحمد حسين يكتب: نموذج مشرف للأطباء

من اسبوعين تقريبا طفل ايده اتكسرت .. أهله ودوه لأقرب طبيب عظام لمكان إقامتهم طبيب متخصص بس صغير في السن ..

الطبيب عمل التدخل اللازم للطفل بدون الدخول في تفاصيل علمية بعد اسبوع أهل الطفل عملوا أشعة للاطمئنان علي الكسر بعد تعليمات الطبيب المعالج طلع الكسر مش في وضعية سليمة -احد المضاعفات الوارد حدوثها – المهم والد الطفل راح عمل محضر إهمال طبي للطبيب وطلع علي دكتور كبير ومعروف وثقة بالنسبة ليه..

الطبيب الكبير سمع والد الطفل وشاف الأشعة وكشف علي الطفل وعرف بالمحضر اللي أتعمل .. طمن أهل الطفل وفهمهم انها مضاعفات ممكن حدوثها وأنها مش إهمال ولا خطأ طبي وان الطبيب المعالج الاول عمل التدخل الصح وبطريقة صح .. وتعهد بعلاج الطفل من المضاعفات بس في الاول لازم الأب يتنازل عن المحضر ..لان الطبيب لم يخطأ فعلا ..

الأب راح النيابة للتنازل في الوقت اللي كانوا هياخدوا فيه أقوال الطبيب الشاب وتنازل فعلا وأتحفظ المحضر ..

الدكتور المحترم الكبير علما وخلقا ده هوا الاستاذ الدكتور ابراهيم ابو عميرة استشاري جراحة العظام ..

اللي بيعمل قيمة للاطباء تصرفاتهم المحترمة مع بعض اعادة احياء اخلاقيات المهنة وقسم ابوقراط .. الناس الكويسة هيا اللي بتدينا أمل في بكرة احلي ..

مجلس نقابة اطباء سوهاج قرر النهاردة في اجتماع المجلس انشاء قائمة الشرف للاطباء اللي بتقدم قدوة وامل للزملاء وللمجتمع كله .. هنبداها بتكريم الدكتور ابراهيم لموقفه المشرف وتقديم شهادة تكريم ليه ..

اكيد في غيره اطباء تاني كتير بتعمل حاجات تشرف ورائعة في صمت .. وأننا اتاخرنا كتير في تسليط الضوء علي النماذج المشرفة وده خلي الوحش يبان انه العادي .. شاركونا مواقف مشابهة لنشرها وتكريم أصحابها ..

لسة في امل طول ما في ناس زيهم ..