fbpx
أهم الأخبارمنتدي الدكاترة

الدكتور أحمد عاطف يكتب: الدكتور حمادة فى عيادة العظام

 

قد يأتيك البلاء على هيئة نايب جينيور يرفعلك الضغط : …اه والله…فى أول السنة الجديدة أستلم عندنا فالمستشفى مجموعة من النواب الجداد فى قسم العظام…من ضمنهم بقى نايب جينيور معين كدا هو أكيد هيعرف نفسه لما يقرا…محسسنى انه مش جاى يستلم شغل فى تخصص متعب…لا دا جاى يقضى وقت لطيف فــالمستشفى مش أكتر.

يعنى وهو قاعد ف النبطشية كل شوية يقوم مصور نفسه ورافع الصورة عـــالفيس وعلى جروب القسم….مرة تانية فالنبطشية بردو تلاقيه قاعد يتجول “بالجيم” فى طرقة المستشفى بطريقة عجيبة كدا كأنه مثلا ماشى فى فيديو كليب مش فــى مستشفى خالص!…وحجات تانية كتير….النايب أنا هسميه حمادة فى البوست دا…أولا عشان منفضحهوش…و ثانيا عشان هو لايق عليه أسم حمادة أكتر

المهم وأنا قاعد ف العيادة الاسبوع اللى فات سمعت صوت شىء بيطرقع عــالارض بمنتهى الثقة داخل عليا…ببص لقيت جزمة متورنشة ماشية عــالارض…ببص فوق الجزمة لقيت بنطلون أبيض مكوى…ببص فوق البنطلون لقيت قميص وجرفتة وفوقيهم جاكت جلد بيلمع…ببص فوقيهم لقيت دماغ حمادة!

قولتله ايه يا حمادة اللى أنت لابسه دا يا حبيبى…انت جاى تستلم جايزة أحسن نايب!!!…أقلع يا حبيبى الحاجات دى عشان هنجبس حالات يا بابا… يلا يا حبيبى ربنا يهديك متفقعنيش.

المهم قلع الجاكت ولبس بالطو وقعد زيه زى أى مطرب مشهور قاعد فى السويت الخاص بتاعه فــى الفندق…وفى أثناء الكشف كدا اتزحمت الأوضة فجأة وبقت مليانة زباين : ودا لأن مكنش فيه أمن على الباب يوميها ينظم الناس….فأول ما الدكتور حمادة لقى الدنيا زحمة حواليه…قام واقف و لقيته بكل حدة بيقولهم: (لو سمحتوا احترموا خصوصية المرضى)….محدش عبره طبعا وفضلوا واقفين عادى ولا بصوله أساسا 😀 ….قالهم تانى: (لو سمحتوا أحترموا خصوصية المرضى)….محدش عبره بردو….قمت أنا بقى متخن صوتى ومصرخ فيهم بقا:(احترمو خصوصية المرضى..يعنى أطلعواااااااااااااا برااااااااااااااااا…فيه حالة بتكشاااااااااااااااااااااااااف!)…..محدش عبرنى! : D

بالعكس فيه واحدة كانت ماسكة تذكرة كدا زغرتلى وقالتلى ايه يعنى حالة بتشكف…يعنى هى كانت بتولد!….طبعا تمالكت أعصابى وبعدين بصيت مـــالشباك ونديت على واحد مـــالامن اللى عــالبوابة قولتله: (العيادة زحمة والوضع هرجلة جدا….لو سمحتو حد فيكم يجى يشيل الدكتور حمادة و يرميه بره العيادة بسرعة)

وفالنهاية لما الضغط على العيادة ابتدى يقل…لقيت حمادة جاى جنبى بيقولى أنا عاوز أستأذن عشان ابن خالتى عمل عملية ورايح أزوره…قولتله خير عملية ايه…قالى عملية ليزك! ~~~يا بنى ليزك ايه الله يخربيتك…أنت ليه مصمم تجبلى مرض نادر…..هو الليزك بيتزاريا بنى!…دا أخره تبعتله ايموشن الايد اللى بتعمل لايك دى على الواتس وخلاص!……أقعد يا حبيبى الله يكرمك متجبليش المرض اللى بيجي للناس اللى بتتعامل معاك أقعد….فلقيته قام قاعد و طلع موبايله وابتسم و قالى : ( طب ماشى…تعالى أما نتصور سيلفى بقا والدنيا فاضية كدا )

نقلًا من “فيس بوك”

اظهر المزيد
زر الذهاب إلى الأعلى