الدكتور محمد قدوس يكتب: كائنات معزولة اجباريًا

وانت قاعد في التكييف أو في الجنينة أو بتيوجا وتتأمل السقف ..

لو بتاكل بيتزا أو فسيخ ورنجة .. لو بتسقي كحك العيد أو بسكويت في الشاي بلبن أو موكافرابتشينو وحاضن الريموت وبتتفرج ع أي حاجة حتى لو الخليل كوميدي ..

لو كنت ف مارينا أو جمصة أو رايح تزور حماتك وبعدها أمك وأخواتك ..

لو بتعمل شوبنج أو بتاخد سلافي مع الطبيعة ..

لو بتلعب مع عيالك أو مع أصحابك على قهوة بتلعب استيميشن أو الشايب أو دومينو و طاولة ..

لو ماسك ايد خطيبتك وهيمان أو نايم في حجر الست الوالدة بتدعيلك ..

وانت بتعمل أي حاجة من ال فاتوا افتكر ان فيه مخلوقات معزولة إجباريا، من أول الفنيين لحد رؤساء الأقسام مرورا بالتمريض والصيادلة والأطباء، سايبيين بيوتهم و أولادهم عشان لما بطنك تتنفخ من أكل الكحك أو شوكة سمكة بلطي مربربة تقف في بلعومك الكريم أو لما تتجرح وانت بتتحرش ببنت الجيران يلحقوك ويردوك سالما معافا بأذن الله؛ ده كمان بيتزعق لهم ويتم اهانتهم ويردوا بابتسامة واحتساب الأجر والثواب عند الله ..

إلى كل هؤلاء المعزولون نفسيًا واجتماعيًا

نلتقي هناك..

في…

الجنة يا شهيد

الدكتور / محمد قدوس

أدمن صفحة «المصحة»