د. أحمد الجويلي يكتب: صيدليتك في رمضان
فيه اعتقاد شائع – من زمان – عن إن الشغل بيقل في رمضان ..
و ده غير صحيح بالمرة .. بدليل إن القوة الشرائية عند الناس بتزيد تجاه سلع بعينها , زي الياميش و المكسرات و قمر الدين و الكنافة و غيرها .. طب اشمعنى إحنا ؟؟!! ..
خلينا نقول إن لو العميل معاه 1000 جنيه في كل شهر , حتلاقيه بيفكّر يصرفهم بشكل مختلف في رمضان , .. تبقى شطارتنا في إننا نقنع العميل إن عندنا ما يستحق الحصول عليه , خلال شهر رمضان , عادي خالص ..
زي بيبسي و كوكاكولا كده .. بس مع الفارق طبعا .. مبيعاتهم كانت بتقل فعليا في رمضان قبل كده .. يعني لحد من 5 أو 6 سنين كده , لحد ما انتبهوا إنهم لازم يعملوا اللي عليهم أكتر خلال الشهر نفسه , عشان يفكّروا العميل بيهم .. و بقينا نلاقي أجدع حملات إعلانية ليهم , و بقينا نفتكر الإعلانات من كتر جمالها أو من فرط تميّزها .. و في الآخر , الهدف بيتحقق , و بقينا نلاقي – للأسف – الناس بتشرب بيبسي و كوكاكولا ع الفطار و السحور , بدل ما كانوا بيشربوا مشروبات رمضانية مفيدة , زي السوبيا و الكركديه .. أو حتى العرقسوس (والعياذ بالله يعني) ..
طب يعني الصيدلية , نعمل فيها إيه , عشان تكسب بنفس الشكل , و ممكن أكتر , خلال الشهر الكريم بإذن الله ؟؟
ورقة و قلم .. و اكتب ورايا يا سيد الناس ..
أولا
خليك جاهز للأسئلة الرمضانية
مهما عدنا و زدنا كل سنة , حتيجي تلاقي الناس تسألك – بصفتك الخبير الدوائي الأول في المنطقة – عن نوعين من الأسئلة .. النوع الأول : هو كيفية تعديل بعض الجرعات و المواعيد الخاصة بالأدوية في رمضان .. يعني الدوا المدر للبول مثلا , كان بيتاخد قبل الفطار , في رمضان بقى يتاخد إمتى ؟؟ (قبل الفطار طبعا) .. اعرف أكتر من هنا https://wp.me/p9ibpe-oH
.. و النوع التاني : هو تأثير بعض الأدوية ع الصيام و صحّته .. يعني مثلا : اللبوس بيفطّر يا دوك ؟؟ .. لا يا حاج , مش بيفطّر .. إلخ .. (ماتقلقش , إحنا في ضهرك https://wp.me/p9ibpe-ox
ثانيا
سبّق انت بقى , و اعرض خبراتك
يا سلام لو كان عندك “الحسّ التسويقي” و بدأت تعرض المعلومات دي , في جروب الواتس الخاص بالصيدلية , أو في صفحتها ع الفيس , أو حتى في فلاير يتوزع ع الناس في أول 10 أيام , أو حتى في بانر ثابت قدام الصيدلية يا سيدي .. و ده حيخليك برنس في عيونهم , و تزداد ثقتهم فيك , بدل ما همّا ممكن يجيبوا معلومات مغلوطة من مواقع أي كلام , أو من دجال أو مشعوذ !! ..
ثالثا
وفّر كل ما يمكن احتياجه
هات مضاد للحموضة بكميات محترمة , عشان الناس اللي معدّية في الشارع تشوف إعلان عنه .. هات معجون أسنان بالمسواك .. أو هات المسواك نفسه , و وفّره عندك داخل الصيدلية .. خلّي عندك العطور التراثية الجميلة .. عود و مسك و عنبر .. إلخ .. الحاجات دي بتفرق في رمضان على فكرة .. و دي مجرد أمثلة .. انت ممكن توصل لتوفير كراسي طبية صغننة , تساعد كبار السن على أداء صلاة التراويح في المساجد بشىء من الراحة .. بس انت قوّي قلبك ..
رابعًا
لاحظ ساعة الذروة
بلاش توزع مجهودك خلال اليوم , بشكل متساوي .. و لكن لاحظ الناس بتيجي إمتى , خلال أول يومين أو تلاتة , و عيد توزيع شيفتاتك يا ريس , عشان تكون بكامل طاقتك في الساعة المزدحمة .. و باقي اليوم , عيّن باقي الستاف براحتك .. خليك لمّاح .. لو المسجد اللي جنبك بيتملي في التراويح , فدي ساعة رائعة بالنسبة لك , لو تواجدت بعد التراويح مباشرة .. و هكذا
خامسا
اعمل عروض .. الناس بتحب العروض
ضم كذا حاجة من الاكسسوار على بعضهم , و لفّهم بشريطة حمرا جميلة , و حطّ عليهم ستيكر لطيف , مكتوب عليه سعرين .. و اشطب ع السعر الكبير , بالشكل اللي يوحي بإن حصل خصم .. حتلاقي الناس بتمدّ إيدها ع العرض , و تحاسب عليه عند الكاشير بإذن الله .. أنا أعرف صيدليات , تخلّصت من ستوكات راكدة بالكامل , بالحركة دي !! ..
سادسا
ثبّت مواعيدك , و اعلن عنها
لو ناوي تنام بعد الفجر – انت و كل الستاف بتاعك – اعلن من دلوقتي إن الصيدلية حتفتح في رمضان من الظهر .. بلاش تفتكر إنهم حيتعوّدوا من نفسهم على كده .. و إلا حتخسر كتير من عملاءك في الفترة دي , لما ييجوا في الفترة الصباحية مثلا .. و حترجع تخسرهم تاني , لما تفتح بعد العيد – بإذن الله – و تلاقيهم بييجوا لك بعد العيد !!
سابعا
حضّر أسطول ديلفري .. في ساعة قبل الفطار
المريض المصري معروف بجبروته , بيفتكر طلبات عجيبة من الصيدلية , في ساعة ما قبل الفطار .. و دي الساعة اللي كل الناس بتقفل فيها , .. فلو عرف إنك فاتح خلالها في رمضان , ممكن تكسب دهب حرفيا !! .. و يا سلام لو وصّلت له طلباته لحد البيت .. يااااااااااااه .. حتبقى عيشة , و حيشيلها لك جميلة طول عمره .. أو لحد رمضان اللي جاي ع الأقل =D .. و لو حبيت تمضّيه على كمبيالات في الساعة الضيّقة دي , ممكن ما يعارضش , .. المهم تديه اللي هو عاوزه ..
قول لنا , إيه أكتر نصيحة عجبتك في التعليقات ؟؟
المهم , دول كانوا 7 نصايح ممكن تنطّق بيهم صيدليتك في رمضان – بإذن الله – لو عاوز تتعرف على 7 أسباب بتخسر بسببهم بقى لك سنين , ابعت كلمة “باخسر إزاي” لخاص صفحتنا
د. أحمد الجويلي
صيدلى ومحاضر في علوم OTC
