د. محمد نصر الله يكتب: 14 ملاحظة حول مايُثار عن قضية تجارة الأعضاء
ردود علي خرافات تتعلق بزرع الأعضاء عموما وكذلك بموضوع قضية تجارة الأعضاء المثارة حاليا:
1- الناس اللي اتمسكت دكاترة كبار وكويسين “علميا و ماليا” ولهم وضعهم العلمي ومشاهير.. هم ما اتمسكوش عشان الكبار بيحاولوا يخلصوا منهم ولا عشان “دي مافيا بتاكل بعضها”..
2-الدكتور المؤهل اللي عايز يشتغل زرع بيشتغل .. واللوائح والقوانين المنظمة معروفة .. وأماكن التدريب العملي معروفه (مش كهنوت مغلق وال باتشينو واقف بالمطواة)
3- الأطباء دول ما زالوا متهمين وليسوا جناة ولا مدانين بعد.. فلنتق الله
4- هم اتمسكوا متهمين بزراعة عرب من مصريين بدون موافقات من لجان أخلاق المهنة أو اللجنة العليا لزرع الأعضاء وليس لسبب أخر (طبعا ده غلط ولست في محل للدفاع عن هذا لأنه خطأ جسيم وغلط لا يقبل… لكن التهم التي تكال لهم عالفيس بدون دليل أو منطق في رأيي جريمة أكبر بكتير من تهمتهم دي..انظر 5 و 6)
5- طبعا هم مش بيهربوا أعضاء عبر الحدود لأن مبدئيا ده محتاج أجهزة وامكانيات غير متواجدة في مصر أصلا وتكلفتها فلكية وماحدش يعرف يستخدمها في مصر من أساسه (نقل عضو حي للزراعة مختلف شوية عن نقل كيلو كبدة من عند الجزار)
6- طبعا مافيش حاجة اسمها أطفال بتتخطف ويسرقوا أعضاءهم ويرموهم (معلش ثانية واحدة لأني وقعت من الضحك) ببساطة لأن ما ينفعش تاخد كلي من طفل لراجل كبير (الكلي المزروعه غالبا هاتبوظ خلال ساعات أو أيام.. ما ينفعش يا نجم) .. ولأن المتبرع لازم تتعمل له فحوصات كتيرة لو ما اتعملتش الكلي مش هاتشتغل وساعتها ماحدش هايجي يزرع تاني في نفس المكان (ايوة.. حتي لو هم مجرمين مش هايبقوا عايزين الزباين تطفش)
7- ليه يسرقوا اطفال و اجرام ابو رجل مسلوخة ده.. القانون المصري لا يجرم الزرع من غير الاقارب … والمريض لما بيعوز متبرع بيعمل اعلان وبيلاقيه وبسهولة ويرجع لك بعد يومين بعشر متبرعين.
8-الزرع انقاذ حياة مش كافيار وفنتازيا.. انقاذ حياة… بجد
9- الزرع مش حاجة لفاحشي الثراء… الفقير يقدر يزرع.. وعلي فكرة الزرع في أغلى حتة فى مصر أرخص من تمن عربية صيني موديل 2014
10-الصور اللي الناس بتنشرها لأطفال بطنها متفرغة ومتخيطة ومربوطين بسلاسل أحب أقول للي نشرها إن خياله عدي المجرة.. بذمتك اللي قتل العيال وسرق أحشاؤهم بيخيط الجلد بعد “العملية” ليه؟ طب بيربطهم بسلاسل ليه؟ هم مش كانوا واخدين بنج؟ ولا دي كانت لقطة من فيلم فامباير.
11- التهم الموجهه فعليا من النيابة لأغلب “المتهمين” تتعلق بالأموال التي وجدت معهم وبالإهمال الطبي وزرع بدون موافقة لجنة الزرع (طبعا غلط لا يستهان به وكارثة.. لكن ليس للقتل والخطف وتقوير بطن الناس)
12- أنا لا ادافع عن أى تصرف خاطئ أو خارج عن القانون ولا أؤيده أبدا بل واقف بشدة ضده وأويد كل من يتصدي له.. واسأل الله أن يكون زملاؤنا أبرياء من هذه التهم.. لكن حتي لو ادينوا فهناك فارق بين التهم التي يتناقلها الناس وبين التهم التي وجهتها النيابة.. حرام.. دول ناس ليهم أسر .. اتقوا الله
13-يا ريت نحكم العقل والمنطق وما تخافش علي عيالك من “تجار العضاء” لأن مالهمش فايدة كمتبرعين حتي لو انت موافق… والصور المنشورة دي غالبا من الدول المنكوبة حوالينا وما اكثرها
14- كمان مرة: هل هم اخطأوا.؟.. هانعرف قرار المحكمة..
لكن احب اقول للي بينقلوا البهتان اتقوا الله
د . محمد نصر الله
أستاذ أمراض وزراعة الكلي بكلية طب قصر العيني
عضو الجمعيات المصرية والأوروبية والدولية للكلي وزرع الكلي
