كيف تقلع عن التدخين؟
في البداية لابد أن تعرف أن القرار فكرة ، ولازم تكون مقتنع بيها وتقاتل من اجلها وانك انت المسئول عن حياتك وكل واحد فينا عنده القدرة انه يعمل اى حاجه هو عايز يعملها ولكن ينقص البعض منا الايمان بقدرته
اول حاجه هنعملها اننا نقعد مع نفسنا ومعانا ورقة وقلم عشان نحدد كل مكاسب وخساير التدخين من البداية لحد دلوقتى ومش تتصدم من الخساير المادية عشان هتكون مبلغ محترم وبعد ما حددنا المكاسب والخساير ، احدد ليه انا بدخن ؟
ايه المبرر والسبب الذى جعلنى ادخن وكمان نحدد الاماكن اللى بنشرب فيها والاشخاص اللى بنشرب معاهم ونحدد الاوقات اللى بنشرب فيها كتير زى (اكلة دسمة لحظة عصبية او غضب ) نحدد بدايل للاماكن والاشخاص ولاوقات العصبية والروابط السلوكية ونحدد ايه ماهية التدخين بالنسبة ليا.
هيا لنرسم الخطة العلاجية اول حاجه عشان الناس اللى بتدخن كتير هنقلل كمية السجاير من علبتين الى علبة ومن علبة الى نص علبة وبعدين نبدأ بفك الراوابط السلوكية اللى قولنا عليها واحنا بنقلل وبعد الاسبوع الاول نوقف فجاة دون مقدمات هتكون مش مركز ومرهق وعايز تنام دى كلها احساسات ناتجة من تقليل النيكوتين هنشرب شاي اخضر بدل المشاريب السخنة ولما احس انى لازم اولع سيجارة او اشرب حجر شيشة اكل اى خضار ويفضل خيار او جزر.
اهم حاجه يعدي اليوم الاول وبعد كده الدنيا هتختلف ، ولازم نتكلم دايما مع نفسنا بطريقة ايجابية ازاى ؟ دور على الحاجات الصعبة اللى تغلبت عليها خلي الموضوع تحدي مع نفسك ، وقول لنفسك انا هقدر وانا ارادتي عالية ، ومفيش مستحيل ،هتبدأ تكافء نفسك كل شوية وتدعمها.
طيب انا عملت كل ده ومقدرتش ؟ هاقولك مش عيب اننا نستعين ببعض الادوية تحت اشراف طبيب.
طيب هتقول انا عملت كل ده وحصل حاجه عصبتنى فكنت محتاج اولع واطلع غضبي فى حاجه؟ اقولك العب عشرة ضغط.
طيب هتقول انا صاحبي حلف عليا انى اشرب وانه الموضوع مش هيجي من #سيجارة وحدة ؟ هاقولك صاحبك ده تبعد عنه تماماً.
طيب هتقول ايه اللى احنا عملناه هاقولك احنا عملنا تعديل لسلوك مش صحى لسلوك صحى ازاى؟ انته بتلعب رياضة دلوقتى ،ومش بتشرب منبهات وبتحرق دهون من شرب الشاى الاخضر .
وكمان عملنا حوار ذاتى ايجابي مع نفسنا وعملنا تعديل لافكارنا عن التدخين.
ممكن تعمل حصالة وحط كل يوم تمن السجاير اللى كنت هتشربهم واستنى لمدة كام سنة وشوف الملبغ هتعمل بيه ايه.
خد بالك انت الآن محاط بعشرين الف فخ وكل فخ هيرجعك لنقطة البداية.
أ/ على عبدالباسط
اخصائي العلاج النفسي بمركز أ.د محمود الوصيفي للطب النفسي و علاج الإدمان
