نائب برلمانى يوصل رسالة طبيب لوزير الصحة

تقدم النائب عاطف عبدالجواد، بطلب إحاطة للدكتور علي عبدالعال رئيس مجلس النواب، موجه للدكتور أحمد عماد وزير الصحة، بسبب تدهور حال المنظومة الصحية في مصر.
ولأول مرة في تاريخ طلبات الإحاطة، يقوم نائب بنقل رسالة طبيب وتحويلها لطلب إحاطة يناقش تحت القبة، وجاء في طلب الإحاطة:
طبقا للائحة المجلس الموقر أتقدم بطلب إحاطة موجه إلى الدكتور أحمد عماد وزير الصحة وهو تعبير عن طلب شعب بني سويف، الذي اختارني لأمثله وهي رسالة أيضًا من طبيب في وزارة الصحة طلب مني توصيلة للوزير، حيث يطلب رفع سعر تذكرة الكشف بالمستشفيات الحكومية، لو أن حالة الاقتصاد تستدعي ذلك وسيكون المقابل تقديم خدمة مميزة.
وتساءل الطبيب في رسالته «ليه يا سيادة الوزير مخلي التذكرة بجنيه واحد حتى الآن ألا تعلم حضرتك أن المريض يدفع جنيه واحد ثمنًا للتذكرة ولما نكتبله على حقنه بيطلع يشتري السرنجة بجنيه ونص هذا لو وجد الحقنة موجودة في المستشفى أصلًا”.
ليه بنضحك على الغلابة ونخلي التذكرة جنيه واحد ويفرح وهو راجع البيت بزجاجة دواء (إن صح التعبير أنه دواء فعلًا) ولكن الحق يقال شوية مية ملونه متعبيين في زجاجة ومكتوب عليها (خاص بوزارة الصحة) والا شوية برشام وكبسولات برضه عديمة الفاعلية.
لا احترام للبشر ولا كشف كويس ولا علاج كويس (كل ده في سبيل أن التذكرة تبقى بجنيه واحد)
لو اضطرنا الحال لرفع قيمة التذكرة من جنيه واحد إلى خمسة جنيهات ماذا سيحدث لو أن هذه الخمسة جنيات دي لم تدخل جيب المسئولين ننتظر أن نرى مايلي:
١_ هيقل عدد الكشوفات للناس اللي جاية تاخد علاج ببلاش (تحت بند أبو بلاش كتر منه) واللي شغال في الصحة عارف معنى كلامي كويس.
٢_ هترفع مرتبات الأطباء والتمريض

وموظفي الصحة فلما أخد مرتب محترم هعرف أدي الشغل حقة وحضرتك أكيد عارف معني كلامي كويس.
( الدكتور هيكشف بضمير والممرضة هتعامل المرضي كويس) بدل ما إحنا شغالين لله والوطن وياريت عاجب ولا نافع
٣_ هتتعاقد مع شركات أدوية محترمه تصنع أدوية بمعايير دولية (يكون فعال وبيجيب نتيجة) ومش هيحتاج المريض يشتري أدوية كتير من بره المستشفى.
٤_ المريض هيلاقي اهتمام ومعاملة آدمية سواء في انتظار دور الكشف أو أثناء الكشف أو في صرف العلاج
٥_ هتوفر الأجهزة والمستلزمات الطبية المطلوبة فى المستشفي وهتصلح الأعطال الموجودة في الأجهزة القديمة وتشتري أجهزة حديثة تساعد فى التشخيص والتحاليل والعمليات.
٦_ هتدرب العاملين بوزارة الصحة دكاترة تمريض موظفين عمال هتدربهم عشان يقدموا الخدمة الطبيه على أكمل وجه
٧_ هتقلل عدد الدكاترة اللي عمالين يطفشوا يوميًا. للدول العربية والأجنبية يدوروا على عيشة محترمة ومرتب محترم
٨_ هتسفر حضرتك دكاترة يتعلموا بالخارج ويرجعوا يطبقوا اللي اتعلموه بدل ما المريض هو اللي يسافر
٩_ هترمم الأماكن القديمة في المستشفيات أو تهدها وتبني جديد.
١٠ _ هتوصل معظم المستشفيات لحالة من الإكتفاء الذاتي ومش هتحتاج تحول العيان وتبهدله لأن المستشفى هيبقى فيها كل الإمكانيات.
ممكن اكتب ١٠٠ نقطة بس كفاية كدة وكل هذا بالخمسة جنيهات.
وختم النائب قائلًا إن هذه الرسالة من طبيب بمستشفى قريتى أردت أن أبلغها للوزير في صورة طلب إحاطة طبقًا لما كفله لى الدستور ولائحة مجلس النواب وليس المقصود من طلب الإحاطه هو زيادة سعر التذكرة من واحد جنيه لخمسة جنيهات لكن المقصود هو تصحيح مسار العلاج فى المسنشفيات والوحدات الصحية بالمدن عامة والقرى بصفه خاصة حتى لو تطلب ذلك زيادة سعر التذكرة لكن بعد تصحيح الأوضاع المترديه التى ذكرتها فى طلب الإحاطة.