ننشر رسالة زوجة طبيب امبابة المتهم بقتل السايس

ده الدكتور محمود #طبيب_امبابه

عمره ماكان بلطجي ولا عمره فكر يكون بلطجي لانه ببساطه راجل متعلم تعليم عالي واهله مربيينه كويس ده غير انه رب اسره وله ابن يعني بكل الظروف والاحوال عنده شيء يخاف عليه

كل الناس القريبين مننا عارفين ان محمود شخص هاديء ومسالم معندوش ميول للعنف

سبق وكنا ساكنين في منطقة الهرم واتسرقت شقتنا وبرغم اني شفت الحرامي بنفسي الا اننا سلكنا مسلك قانوني ومشينا في اتجاه قانوني ومحصلش حاجه بالعكس احنا خفنا من الحرامي وسبنا البيت ونقلنا لمكان بعيد اجاره اغلا بكتير لمجرد انه كمباوند مقفول كنوع من الحفاظ على ماتبقى من ممتلكاتنا وخوف على حياة ابننا انه يتخطف فلازم نحافظ على نفسنا حتى لو كل مرتب جوزي دفعناه اجار

عشان مطولش عليكم الا ان الطوفان ده زي ماطالنا اكيد فيوم هيطول ناس كتير

محمود زيه زي اي طبيب مرتبه ضعيف ..ووارد.كل يوم انه يتعرض للضرب في المستشفى وطبعا زي مانتم عارفين بياخد نباطشيات بالليل وكل الاطباء عارفين يعني ايه تكون شغال في مستشفى امبابه وبتاخد نباطشيه ومستني فاي لحظه يدخلك بلطجي ينهي حياتك لمجرد انه شارب مخدرات

ومنظومة وزارة الصحه زي القطران اصلا بتدوس على الاطباء وعشان كده محمود بجانب شغله كان بياخد كورس الماني فمعهد جوتا عشان نفسه يسافر المانيا لعل وعسى يتعامل هناك بحترام

محمود لما حصل ان السايس تعدى عليه مكانش ناوي يقتله ولا هو شخص دموي ولا هو ماشي يقتل الناس …ومش هيضيع مستقبله وسنين تعليمه فقتل واحد بلطجي

الي حصل ان محمود اتحط فموقف انه لو مقتلش كان هيبقى هو القتيل ….محمود اتعرض للضرب ادام امن المستشفى وفي الشارع ومحدش ساعده ولا وقف معاه ووقف لوحده يواجه بلطجيه والاطباء هربوا

محمود ممكن يكون اي شخص فينا ومش بدافع عنه عشان انا مراته …ايوه انت مضطر تتعامل مع سايس بيبيع مخدرات وتديله اتاوه …انت مضطر تقفله ذليل وتقوله خلي بالك من العربيه وانت من جواك بتقول لنفسك يارب ميكسرهاش

ايوه في سياس بيأمروك انك تسيب مفتاح عربيتك وفي الشارع من غير جراجات

ايوه #السايس_بلطجي

وعشان الناس مترغيش كتير حطو رقم وهمي وبأكد انه وهمي للابلاغ عن السايس ولو جربتو محدش هيعبركم ولو حد عبركم فنفس اليوم السايس هيخرج يزاول نشاطه

#الافراج_عن_الطبيب

لانه ضحية ضياع امني وضحية سايس بلطجي وضحية وزارة الصحه

ولمعلوماتكم محمود قاعد في مكان غير ادمي ووشه مجروح جروح صعبه ومش بياخد علاج والي وصلني انه بينيموه في حمام القسم بحجة انهم خايفين عليه من اهل البلطجي

محمود جروحه خطيره

ارجوكم تقفو جنبي لان ممكن كلنا نكون #طبيب_امبابه

الرسالة نقلًا عن صفحة “عشان لو جه مايتفاجئش”