استقالة 8 أطباء بقسم النساء والتوليد بـ«طب طنطا».. واجتماع عاجل لبحث الأزمة

أعلن 8 أطباء نواب بقسم النساء والتوليد بكلية الطب جامعة طنطا،  تقديم استقالتهم خلال الساعات الماضية، مرجعين ذلك إلى ضغوط شديدة الصعوبة ببيئة العمل.

ظروف قاسية

وقالت رنين جبر، الطبيبة رقم 8 في قائمة الأطباء المستقيلين: “ف يوم من الأيام جمعونا وقالولنا بالنص انتوا وجودكم مش مرحب بيه ف القسم ،، ومش هنشغلكم ف قدموا استقالاتكم وامشوا، فمبروك خطتكم نجحت “.

وأضافت جبر في منشور لها عبر “فيسبوك”: “يشهد ربنا .. وكل ال اشتغلت معاهم ف القسم دا .. اني عمري ما قصرت ف شغلي وعمري م قصرت ف حق حالة، يشهد ربنا إني عملت كل حاجة اقدر عليها واديت من كل طاقتي وصحتي ونفسيتي عشان خاطر المكان دا، وكان المقابل ولا حاجة ! ولا حاجة حرفيًا “.

وتابعت: “حرفيًا نبطشيات ٤٨ ساعة وتصل ل ٧٢ ساعة ، غير المرور ال بعدهم .. بيوصل ل ٨٢ ساعة . والله والله كنا بننام ف ال٨٢ ساعة اقل من ٦ ساعات .. ايام كتير مكنناش بننام فيها او بنقسم نوم كل واحد نص ساعة او ساعة الا ربع”.

وأكملت: “والله والله من اسبوعين نبطشية ٤٨ ساعة نمت فيها ساعة ونص بس ، كنا بننام ع الارض او ع سراير المرضى وسراير الولادة .. واحيانًا كنت بنام عالكرسي ال انا قاعده عليه عشان مفيش مكان “.

وواصلت: “كان مطالب مني اكون ف القسم قبل النبطشية الساعه ٦ الصبح واحيانًا كانوا بيطلبوا مننا نكون هناك من ٥ الصبح .. عشان نستلم بدري ونمر بدري ونبلغ بدري ، احيانًا كتير كانوا بيطلبوا مني وانا يوم مرور ومش نبطشية ومروحة ٤ او ٥ المغرب وف بيتي انزل الساعه ١٢ بليل عشان حاجات ممكن تستنى للصبح عادي ، كانت الكلمة المشهورة “انا عايز كل النواب صاحيين” والبانش ال كنا بنتهدد بيه “مفيش تقسيم نوم” ..

وزادت: “عندنا ال بيغلط كل دفعته بتتبنش معاه ..مرة اتبنشنا بيات اسبوع ف المستشفى كونتونواس مع مرور ع العنبر كل ساعه .. أسبوع بننام ف المستشفى على الأرض مش بنشوف أهالينا .. ممنوع ننزل ناخد دش ف السكن حتى .. ممنوع ننزل لأي سبب ، وكانوا بينزلوا فجأه يتأكدوا إن كلنا موجودين ، مرة اتبنشنا بيات ٣ أيام ف المستشفى قبل نبطشية ال ٣ أيام .. ف قعدنا ٦ ايام ف المستشفى “.

وأردفت: “قوانين المكان يوم م استلمنا قالولنا : ممنوع ننام من غير م نعرف ال فوقينا ان احنا نايمين وهو ليه حرية انه يوافق ينيمك او يقولك لا مفيش نوم طول ما في شغل .. ممنوع ننزل نجيب ماية من تحت او ندخل الحمام ف السكن من غير م نعرف كل الناس ال فوقنا “.

اجتماع عاجل

بدوره، أعلن عميد كلية الطب بجامعة طنطا، أحمد غنيم، عقد اجتماع عاجل في أعقاب استقالة 8 أطباء من أصل 15 من قسم النساء والتوليد، وما صاحب ذلك من شكاوى حول ظروف العمل.

وأوضح غنيم، أن الاجتماع يهدف إلى بحث تفاصيل الأزمة والاستماع إلى كل الأطراف من أجل الوقوف على حقيقة ما جرى، واتخاذ ما يلزم من قرارات بما يخدم مصلحة المنظومة الطبية والمرضى، ويضمن بيئة عمل عادلة للأطباء.