أهم الأخبارمنتدي الدكاترة

د. أحمد حسين يكتب: رسالة من أم شهيد .. قلبى موجوع على ابنى وأولاده

مهما توحدت مع وجع الآخرين وانتقيت من الكلمات أصدقها تعبيرًا عن معاناتهم، فلن تصل إلى صدق وتعبير صاحب المعاناة والأكثر ألمًا و شقاءً بها.. وصلتني رسالة من أم طبيب استشهد وهو يؤدي عمله في مجابهة فيروس كورونا المستجد وعلاج المرضى منه، كانت الرسالة تعليقًا على مقال كتبته منذ أيام.

فضلت أن انقلها كما هي لثقتي في وصول كلماتها إلى قلوب من يقرأها و آملي لوصولها إلى عقول المسوؤلين .. كتبت أم الشهيد:-

«ازيك يادكتور احمد إن شاء الله تكون بخير، أنا شوفت أمس المقال بتاع حضرتك ، كل الكلام اللى فيه حقيقى تعمل ايه اسر الأطباء اللى استشهدوا بالمعاش الذى لايتعدى الف جنيه، زوجة ابني قالتلى انها سمعت أن معاشه 900 جنيه ،هو المعاش لغاية دلوقت مافيش أخبار عنه، الدكتور اللى كان بيلف طول اليوم محروم من اسرته علشان يوفر لهم حياة كريمة يكون مصير اسرته كده! ، إيجار الشقة لايقل عن 3000 جنيه، والأطفال صغيرين، حياته انتهت علشان اشتغل بضمير وانسانية ليحمي غيره، وقف وحده فى وجه الوباء اللعين اللى دمر حياته.

دلوقت لازم وقفة من جميع الاطباء والنقابات على مستوى مصر كلها للمطالبة بمعاشات إستثنائية مثل الجيش، لأن اولادهم لهم حق فى حياة كريمة ،و كفاية انهم اتحرموا من ابوهم.. لابد من مناشدة للسيسى ورئيس الوزراء و وزيرة الصحة.
وللعلم أنا ما شفتش حد ، أى حد طالب بهذا الحق غيرك والدكتورة منى مينا و الدكتورة ايمان سلامة ، وطلبت من الكل يقف ويتكلم والكل صامت واخد احتياطاته لنفسه ، وعلى فكرة ما حدش عارف الدور على مين.

قلبى موجوع قوى على ابنى وعلى اولاد ابنى و مصيرهم ايه فى الحياة، هم وكل اللى زيهم اللى والديهم استشهدوا.
رجاءً يا دكتور أحمد اهتم وعليّ صوتك ، و ناشد جميع الأطباء والنقابات يقفوا وقفة شجاعة ويهتموا بهذا الموضوع لمصلحة الكل.

آسفة على الإطالة وتضييع وقتك و حضرتك شخصية مهمة ولها صوت عالي وقوي، ربنا يساعدك ويقويك ولك جزيل الشكر..وعلى فكرة انا غير نادمة انى كتبت لك.»

وعندما استأذنت والدة الشهيد بإذن ربه في نشر رسالتها، أجابت “نشر بدون اسماء مش علشان انا خايفة من أى شى، أنا مصلحة أولاد ابنى أهم شيء عندي، بس مش عايزة حد يجرح فى زوجة ابنى واولاده الأربعة، ولو كانت وزارة الصحة موفرة الإمكانيات ما كان حصل أى مكروه لأى طبيب، اتمنى لا تذكر الاسماء منعاً للإحراج، لأن اسر الاطباء مش بيشحتوا، ده حق ليهم نظير أمانتهم فى عملهم ،ولايضيع حق وراه مطالب”.

موضوعات ذات صلة »

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى