أهم الأخبارمنتدي الدكاترة

د. محمد شبيب يكتب: مناعة القطيع والوضع الحالى لفيروس كورونا بمصر

منااااااااااعة القطيع – ال عاوز يفهم احنا فين
وهل ال اتعدي وخف ؟ ممكن يتعدي تاني ؟؟؟؟؟
إحنا دلوقتي في مرحلة مناعة القطيع Herd Immunity
يعني إيه مناعة القطيع ؟؟
يعني كل الناس يجيلهم فيروس كورونا ويجيلهم مناعة منه عشان نقدر نعيش عادي ونعدي الأزمة دي ، ودي اللي بتعمله كل دول العالم فيما يسمى بمرحلة التعايش مع الفيروس
طيب يعني اللي يجيله الفيروس مرة مش هيجيله تاني ؟؟
الإجابة من غير الدخول في تفاصيل علمية ونظريات كثير
أيوه إن شاء الله ده المتوقع وده اللي بيحصل دلوقتي
اللي جاله مثلا التهاب رئوي مرة الفترة دي مجاش ليه تاني
يعني بيبقي عندك مناعة منه ومش هيجي تاني إن شاء الله
طيب ما طالما كده كده هيجيلنا ليه عمالين تقولوا لينا خدوا احتياطاتكم والبسوا مسكات وتباعد اجتماعي ؟؟
سؤال حلو وإجابته كبيرة شوية بس نركز
بنقول كده عشان مش كل الناس يجيلها العدوي مرة واحدة
وأعداد الناس اللي محتاجة خدمة طبية تبقي كتير فتضغط علي النظام الصحي فأعداد الوفيات من المرض تزيد وكمان أصحاب الأمراض الأخري اللي محتاجين خدمة طبية ميلاقوش الخدمة دي لقلة الأطقم الطبية اللي نسبة منهم هيتصاب أو هيموت زي ما انتم شايفين
فلازم نحافظ عشان نقلل عدد المصابين ده أولا
ثانيا: عشان لما حضرتك تلبس كمامة مثلا وتلتزم بالاحتياطات الكاملة كمية الفيروس اللي هتدخل ليك تقل ومتبقاش كتيرة فمتعملش أعراض شديدة
ودي اللي بيسموها viral load
يعني واحد واخد احتياطاته الكاملة دخل له 100 فيروس
مش زي شخص مش واخد احتياطات ودخله الف فيروس
وده ممكن اللي بيفسر وفاة شباب من الأطباء والتمريض
نتيجة تكرار تعرضهم للفيروس وزيادة فترة وجودهم في بيئة مليئة بالفيروس
ثالثا : الفيروس مع الوقت بيقال إنه بيحصله ضعف في السلالات من الأجيال الجديدة من الفيروس
فالعدوي ممكن تبقي أبسط مع الوقت
ببساطة كده زي ما البشر مع الوقت قوتهم الجسدية بتقل
أجدادنا كانوا أقوي مننا وكل ما تنزل في السلالة بتقل قوة البشر وهكذا
فلما تيته الجميلة اللي قاعدة في البيت يجيلها الفيروس دلوقتي وهو في شدته وتتعب جامد فرصة إنها تتعرض لمضاعفات أكتر بتزيد
مش زي لما يجيلها لما يبقي في طور ضعيف
يارب النقطة دي تكون وضحت
طيب إيه الأعراض اللي ممكن تيجي للشخص وهل هو خطير ؟
الأعراض متفاوتة جدا وحضراتكم قرأتم علي النت وسمعتم في الفيديوهات بما فيه الكفاية
وعرفتم إن حوالي 80 % هيجيلهم الفيروس من غير أي أعراض خالص ولا هيحسوا بيه
ولو تفتكروا أول حالة في مصر كانت لشخص أجنبي مسحته إيجابيه ولكن بدون أعراض
حوال 15 % ممكن يجيلهم أعراض بسيطة إلي متوسطة
وقد يحتاجوا مراجعة الطبيب للكشف والاطمئنان علي حالتهم الصحية وطلب الفحوصات اللازمة
بنتكلم في 5 % اللي ممكن يحتاجوا رعاية وقد يموت نسبة منهم
يعني الفيروس ده من غير أي علاج خالص نسبة الشفاء وإنه يعدي عادي نسبة عالية جدا
يعني أنت شوفت ناس شفيت من الفيروس ده ؟؟
أيوه كتير جدا بفضل الله تابعت حالات كتير كانت إيجابية وكتير منهم كبار في السن وبقوا زي الفل دلوقتي الحمد لله
ده غير طبعا الحالات اللي كان عندهم الأعراض التنفسية الشديدة زي التهاب رئوي ومعملوش مسحة لأي سبب من الأسباب وبرضه بقوا زي الفل الحمد لله
يعني الحالات كتير الفترة دي؟
طبعا ده مش محتاج إجابة
بص حواليك وأنت تعرف هتلاقي كتير من عيلتك تعبانين أو تعبوا الفترة دي
كتير من أصحابك او جيرانك أو حتي حضرتك ممكن تكون تعبان شوية أو تعبت وخفيت
استني بس يا دكتور هو أي تعب الفترة دي كورونا ولا إيه
ده كده بقي الكلام اللي طالع عليك إنك بتقول لكل اللي يجيلك عندك كورونا كلام صح ؟؟
هو طبعا الناس بتحب تتكلم كتير وتزود من عندها وعشان الكلام يبقي ليه صدي يقوله الدكتور بيقول ويجودوا بعد كده والصراحة الكلام بيبقي مسلي جدا وبيشغل وقت الناس في جلساتهم ومسامراتهم
بس في الحقيقة برضه إحنا في pandemic
يعني جائحة
يعني مرض منتشر في كل مكان
والمفروض أي حد عنده أعراض حتي لو بسيطة يعتبر نفسه عنده كورونا وياخد احتياطاته
وده مش كلامي ده كلام العلماء والمنظمات الرسمية
يبقي في الغالب كل اللي تعبان الفترة دي في الغالب هيبقي عنده
وكل اللي خف في الغالب جاله مناعه
طيب اللي يجيله أعراض يعزل نفسه فترة قد إيه ؟؟
أحدث كلام دلوقتي يعزل نفسه 10 أيام من بداية الأعراض
ويزود عليهم 3 أيام بدون أعراض
أمتي نروح نكشف ؟؟
لاتذهب إلي الطبيب أو المستشفي إلا في الحالات التالية
لو سخونية غير مستجيبة للمخفضات
ضيق بالنفس أو كحة شديدة
الشعور بالإعياء والإجهاد الشديد
إسهال مستمر
أي حد من أصحاب الأمراض المزمنة أو كبار السن عنده أعراض جديدة أو همدان
مش أي عرض بسيط تروح تكشف عشان متعملش زحمة وضغط علي الأطباء
إدي فرصة للتعبان بجد عشان ربنا يكتب له النجاه
يعني إحنا نخاف ونقلق ولا نطمئن ؟؟
الصراحة المرض اللي أخطر من كورونا الفترة دي مرض الخوف والذعر الشديد اللي في الغالب لا يدعو إلي عمل بل يدعو إلي القنوط واليأس وأوقات كتير لضعف المناعة
الموضوع بكل بساطة وباء عالمي خطير أيوه
بس نسبة الشفاء منه عالية
حضرتك تاخد احتياطاتك بكل طمأنينة وأريحية
ولا تخاف من المرض
ولتعلم أن ما أصابك لم يكن ليخطأك وما أخطأك لم يكن ليصيبك
وأن مع العسر يسرا
وأن الله لطيف بعباده
يبتليهم ليتوبوا إليه وينقيهم من الذنوب
وأن البلاء رحمة للمؤمنين
من كتب الله لأحد الموت بسببه فأجره أجر شهيد فهنيئا له
ومن نجاه الله فلعله أعطاه فرصة أخري ليصحح أوضاعه

د. محمد شبيب

استشارى طب الأطفال

الوسوم

موضوعات ذات صلة »

زر الذهاب إلى الأعلى
إغلاق
إغلاق