أزمة استقالة طبيب الدمرداش: فتح تحقيق موسع في الواقعة.. والطبيب: عاملوني كعبد 

تداول عدد كبير من رواد موقع التواصل الاجتماعي السوشيال ميديا منشور الطبيب محمد الشرقاوي والذى عرف باسم “طبيب الدمرداش” والمستقيل حديثآ من مستشفي الدمرداش الجامعي التابعة لجامعة عين شمس.

نشر الطبيب محمد الشرقاوي «بوست»، على صفحته الشخصية بموقع الفيس بوك جاء فيه: «النهارده خلصت إجراءات الاستقالة من جامعة عين شمس…وأنا والله لا عايز ابقى معيد ولا مدرس مساعد ولا حتى أستاذ، أنا كل اللى عايزه شوية كرامة وسلام نفسي ومعاملة محترمة، ودي حاجات مش بتتلاقيها بسهولة في مستشفيات الجامعة”.

وأضاف: «الجامعة ماشية بنظام السينيوريتي، يعنى الأكبر منك أو اللي استلم قبلك له أفضلية عليك، وطبيعي جدا أنه يكون فيه شوية مميزات للسينيور، لكن للأسف الشديد اللي بيحصل أثناء محاولة تطبيق المميزات دي أنه السينيور (مش كلهم الحقيقة ) بيكتسب سلطة مطلقة على الجونيور تخليه يقدر يحرمه إنه ينام أو يروح بيتهم او حتى يروح ياكل، والكلام ده مش مبالغة، وفي غياب المحاسبة بيبتدي الطرف صاحب المميزات والسلطة يمارس ساديته ويطلع عقده على كل اللي تحته، والمشكلة إنه كلنا رغم إننا اتحطينا في نفس الظروف واخدنا نفس القدر من التعليم لكن للأسف ما اخدناش نفس القدر من التربية، فيبقى كل طموحك كطبيب لسه مستلم ( جونيور يعني) إنك تروح تلاقى السينيور اللى هتقع معاه شخصية متربية ومعندهاش عقد».

و تابع: «على كل حال هي فترة وعدت وتجربة طلعنا منها بشوية خبرات، وبالنسبة للدكتورة والدكتور فأنا منسيتش ومش هنسى اللي عملوه وأتمنى إنهم يقابلوا في حياتهم ناس زيهم يعملوا معاهم زي ما عملوا معايا».

وحكي طبيب الدمرداش عن بعض المشكلات الشخصية التى حدثت داخل المستشفي جعلته يتخذ هذا القرار “خلونى احكيلكم عن شوية مواقف حصلت وكانت دافع أساسي ان الواحد يقرر يسيب المكان دا، الكلام اللي جاي دا طبعا مواقف شخصية، بس اللي حصل معايا بيحصل زيه وأكتر مع زمايلى في باقى الأقسام.

تالت يوم ليا بعد استلام العمل حصلت خناقة بين دكتورة دفعتي و دكتور تاني أكبر مننا بسنتين، اتفتح تحقيق وطلبوني للشهادة، حكيت اللى حصل، الشهادة دي معجبتش الدكتورة دفعتى ولا عجبت خطيب اختها المدرس المساعد بالقسم و غالبا كمان معجبتش صاحبهم الدكتور السينيور اللى ماسك الوحدة اللى انا فيها، الدكتورة جت اتخانقت معايا و معاها خطيب اختها وبعد ربع ساعة اتصلت بيا من موبايلها بتقولى خد المدرس المساعد عايز يكلمك، وطبعا قالي ” انت يا بابا مش عارف انت بتكلم مين، انت يابني انت طريقة كلامك مع الدكتورة زميلتك اللى أكبر منك مش عاجبانى، قولتله يا دكتور هى دفعتى و كانت بتقعد معايا فى مدرج واحد، قالى لا مستلمة قبلك تبقى أكبر منك، وانت تجيلى وتشيل نباطشيات انت فاهم ولا لا ” و كلام كتير كله إهانات يعنى، انا بس مستغرب انه دكتورة دفعتى معجبتهاش شهادتي فاتخانقت معايا وجابتلى خطيب اختها اللى فى موقع مسؤولية يكلمنى من موبايلها علشان يدينى كلمتين قدامها

تاني يوم قالتلى ” انت تبقى عارف كويس انت بتكلم مين انت فاهم ولا لا، انا سينيور عليك و دي fact لازم تبقى عارفها كويس، انا ال “كذا و عشرين” على الدفعة و سينيور عليك انت سامع ولا لا “.

من جانبه، اكد الدكتور أشرف عمر، عميد كلية الطب جامعة عين شمس، ورئيس مجلس إدارة المستشفيات الجامعية «الدمرداش»، فتح تحقيق موسع حول استقالة الطبيب محمد الشرقاوي، بمستشفيات الدمرداش التابعة للجامعة، إثر تعرضه للظلم أثناء العمل داخل المستشفى الجامعي.

وقال رئيس الجامعة: «سيتم التحقيق اليوم في الموضوع كاملاً و معرفة ملابساته للوقوف عليه والتأكد منه، لافتا إلى أنه حال وجود أي مخالفات أو تجاوزات سيتم اتخاذ كافة الإجراءات القانونية في هذا الشأن