د. ماجد فياض يكتب: كل مريض بتقويمه
أتمنى في السنة الجديدة _ سنة سعيدة علي الجميع إن شاء الله _ إن العيانين يأرخوا شكواهم بالتقويمات العادية المتعارف عليها قديمها، وجديدها عادي يعني
عندك مثلا التقويم الميلادي ، أو التقويم الهجري ، أو التقويم السرياني ،_كلام في سركم أنا بحب أسماء شهور التقويم ده جدا _ خاصة نيسان، حزيران تموز، آيار، وتشرين
الأسماء وإن كانت سريانية و معربة، فإنها موغلة في القدم، إذ إن السريان أنفسهم قد اقتبسوها عن البابليين
والتقويم هو المعتمد رسميًا في دول المشرق العربي (سوريا وفلسطين والأردن ولبنان والعراق)
وهناك عدة أمثال في الثقافة الشعبية مأخوذة عنه مثل مطر نيسان بيحيي الإنسان.، وإجى كانون تختبى ببيتك يا مجنون (دلالة على البرد). وخبي فحماتك الكبار لآذار (دلالة على استمرار موسم البرد في آذار ، وآذار أبو الزلازل والأمطار. وآذار الغدار.
وعندك التقويم الفرعوني القبطي القديم قشطة جدا والديك بيدن يا عم
إذ ما يزال يعتمد عليه بعض الفلاحون المصريون في حياتهم لارتباطه بالزراعة من فيضان النيل وجفافه إلى زراعة المحاصيل وحصادها، وبصراحة أنا بحب الأمثال الشعبية المرتبطة به إذ كانت تشنف إذني وأنا بعد صغير في ريف الفيوم حين كانت تنبت في أفواه الآباء، والأمهات ، والجدات حروف هذه الأمثال
“كيهك صباحك مساك تقوم من فطورك تحضر عشاك” كناية عن قصر النهار، و”طوبة تخلي الشابة كركوبة” أي من شدة البرد صارت تنحني الصبية علي نفسها تروم الدفئ وكأنها أضحت عجوز خانتها عظامها ،و “برمهات روح الغيط وهات” ، و”هاتور أبو الدهب” منثور كناية عن حصاد القمح.
أيها الناس اسمعوا قولي فإني لا أرضى إن يؤرخ كل مريض بطريقته وهواه لأنه كما قالت الفنانة إليسا في أغنيتها الشهيرة (فاكر )
( فده صعب جدا لو تكون في مكاني ، وتعيش حرماني )
بصراحة هتوه توهاني يا أخ هاني!
يعني لسه إمبارح في العيادة بسأل العيانة اللي جاية ومعاها بنتها الكبيرة عملت منظار الكلي من كام سنة يا مدام؟
تقولي من يوم فرح مها وتسأل بنتها
صح يا بت يا ريم مش كده ؟ فأنا قلت لها ومها عاملة إيه مع جوزها دلوقتي ؟
يا رب تكون مبسوطة، تصدقي بالله الجواز اليومين دول حوراته بقيت كتيرة، والمفروض يلغوه ونخلص! اه والله
والعيان اللي بعدها بقوله بتشرب سجاير من كام سنة يا أستاذ فيصل؟
يقولي والله ابتديت بدري من ساعة من دخلت جامعة الملك عبدالعزيز !
واللي سألته عملت من أمته عملية التكميم؟ فيقولي
من بعد ما نقلت من القصيم ؟
متقباش فاهم هو كده بيألش ولا بيتكلم جد!
والعيان اللي بقوله والمغص الكلوي ده جالك من أمته
فيقولي من ساعات ما روحت عند حماتي !
وفي واحد قالي من ساعة ما اتخانقت مع مراتي!
والعيان اللي سألته آخر مرة كنت كويس أمته ؟
يقولي من ساعة المطرة …ينفع كده بالله عليكم ؟
و في تقويمات لا حصر لها ولا عدد زي من ساعة ما سافرنا اليونان، ومن يوم ولادة بنتي رزان! ، ومن يوم ما بطلت أشرب بيرة، ومن يوم رجعت من الديرة، ومن يوم ما اتجوزت مشيرة، ومن ساعة مراتي ما بقيت مديرة!
لدرجة إن العيان اللي بسأله أنت تعبان من أمته؟ فيقولي مثلا من يومين أو أسبوع أو شهر يأخذني الذهول، فأقتص له بنفسي من السكون وأصرخ فرحا، وأقول لنفسي معقول في واحد في كوكب الأرض لسه فاكر الأيام، والإسابيع والشهور اللي إحنا خدناها زمان في ( الكلاس ) وبقوم أعيط في حضنه يا جماعة!.
ليه كده طااه ؟ يعني ربنا يقول في كتابه الكريم إِنَّ عِدَّةَ الشُّهُورِ عِندَ اللَّهِ اثْنَا عَشَرَ شَهْرًا وإحنا نعمل في بعض كده يا جماعة
واحد بس يرد عليّ و يبرد النار اللي قايدة في قلبي ويقولي ليه … ها ليه ؟.
