صيدلانية بـ «الدمرداش» توضح حقيقة نقص الأدوية فى علاج جرحى الانفجار

كتبت رنا حسام صيدلانيه فى مستشفى الدمرداش، شهادات على علاج المصابين فى أحداث انفجار الكنسية البطرسية، وقالت «أنا حضرت كل الاحداث اللى حصلت فى المستشفى وشفت كل حاجه بعينى بقول الكلام دا من غير ولا حرف كذب مفيش ولا دواء ناقص مثل كوناكيون-كابرون-دايسنون زى مافى ناس عماله تعمل share الادويه دى فى الطبيعى موجوده وبوفره»

وأضافت «رغم أزمة نقص المحاليل فى البلد عموماً المستشفى طلع منها كمية محاليل غير طبيعيه ولحد دلوقتى المرضى اللى فى الرعايات او الاقسام من الحادث بيتعلقلهم محاليل عادى جداً مفيش ولا مضاد حيوى ناقص فى الطبيعى فى المستشفى عشان ينقص بيتادين موجود اى مرهم للحروق موجود برضو ، انا لسه حالاً طالعه من الرعايه وشفت كل المرضى اللى موجودين بسبب الحادث وكل علاج مكتوبلهم اخدوه كامل».

وتابعت «بعد إذنكم مستشفى الدمرداش من اكبر المستشفيات اللى موجوده فى البلد بلاش نعمل بوستات مش موثوق فيها راعو ربنا شويه الكلمه بتتحاسبوا عليها … محدش شاف بعينه امبارح كانوا فى دكاتره نازله من بيتها مخصوص ودكاتره عندها امتحانات وواخده اجازه ونزلت من بيتها مخصوص يسعفوا المرضى محدش قَصَر فى اى حاجه حتى بنك الدم الرئيسى للمستشفى الناس كانت قدامه بأعداد كبيره جداً لحد ما الناس اللى جوه قالوا أستكفوا».

وأضافت «الله يكرمكم جميعاً بلاش نقلل من تعب الدكاتره ولا التمريض ولا اى حد شارك امبارح فى المستشفى الناس تعبت بجد جداً ولحد دلؤتى والله العظيم محدش منهم نام من امبارح …. الكلمه هتتحاسبوا عليها الله يكرمكم بلاش كلام ملوش اى صحه من الاساس».