د. ماجد فياض يكتب: قائد سلاح المسالك البولية بالجيش الأبيض
جالي تعليق على صفحتي الطبية الرسمية
يطالبني بسرعة اكتشاف علاج كورونا !!
صحيح أنا دلوقتي بقيت قائد سلاح المسالك البولية في الجيش الأبيض الجديد وصاحب مشروع حرب حظر التبول اللإرادي
ومبادرة الحق في الخبز والسرير الجاف ومؤسس مناورات البول الناصع !!.
بس ليه الأخ سايبب خناقات ومفاوضات ترامب مع رئيس مجلس إدارة الشركة الألمانية لمكافحة الحشرات والرش المنزلي بالعاشر علشان اختراع علاج للكورونا.
وإعلان منظمة الصحة والدواء للبدء في التجارب السريرية للقاح المرتقب.
وخناقات الصين وتصريحاتها المستفزة أنها حرب بيولوجية مصطنعة علي لسان مسؤل غير مسؤل في وزارة الخارجية وتبني رأي عجيب لنظرية المؤمراة.
وسايب خناقة العلمانيين مع المتدينين علي اعتبار كورونا بلاء من الله ولن يرفع إلا بتوبة ولا مجرد تحدي علمي عادي يعني مش أزمة .. وسايب موسم تزاوج نظرية المؤامرة والحرب الإقتصادية ولما يطلع اللقاح ويلموا المليارات يبقي صحوني من النوم أصل بحب الحتة دي أوي وساعتها متنسوش تلقحوني احتياطي وكده.
وسايب تشنجات مي خريستي _ ودي واحدة لا ينصح مرضي الضغط والإكتئاب وضعاف المناعة والذئبة الحمراء وصعوبة البلع بمشاهدة فيديوهاتها بالذات الفيديو الأخير اللي أثار غضب المصريين _ ، وجاي علي قرمط الغلبان بتاع المسالك البولية وعاوز أخترع له علاج للكورونا اللئيم.
علي نفس طريقة مي خريستي اخاطبكم الآن أيها المصريين
أنا من العلماء اللي هناك حتي اكتبوا يا مصريين يا أولاد بلدي علي جوجل مين ماجد فياض _ وأنا مش مسؤل طبعا عن اللي هتشوفه _ وآدي جواز السفر بتاعي أهو نفتح كده راندملي (عشوائي كده)
أهو يا مصريين نشوف مكتوب إيه
هذه الوثيقة ذات شأن عظيم حافظ عليها من الأسد ومن الضياع
بتضحكوا يا مصريييين
انتوا فاكرين إني بهزر شيم أون يو يا مصريين يا أولاد بلدي
أنا طلع حرفيا لما جواز سفري ضاع في الدنمارك وطلع عيني في قسم القنصليات والهجرة في مجمع التحرير يا مصرييين.
أنا من العلماء اللي هناك في أمريكا والاكوادور وجزر القمر وساحل العاج وبيبوسوا صباع رجلي الصغير في FDA ودي طبعا غير CIA وغير AUC اللي في وسط الدلتا يا مصريين
علشان اختراعي لتفتيت الحصوات عن بعد
وده فكرته زي الطيارة اللي بدون طيار
الست بتبلغ عن جوزها إنه عنده حصوات في الكلي
وأنا قاعد مكاني في العيادة برصد الهدف وأوجه شعاع الليزر علي الهدف افرتك الحصوات وهو قاعد في بيته علي الكنبة بالفنلة الحمالات أو حتي علي قاعدة الحمام أو متنيل قاعد بيشيش الفاجر مع أصحابه علي القهوة عادي.
أنا شغال دلوقتي علشان اطور المسافة يا مصريين من 50 كيلو متر إلي عشروميت ألف الكيلومترات علشان اقدر أعالج الناس في بلدي وأنا قاعد هنا.
شيم أون يو يا مصريين.وانت كمان يا أخ يا اللي بتطالبني باختراع علاج للكورونا شيم أون يو.
د ماجد فياض
استشاري جراحة المسالك البولية السعودي الألماني جدة
