د. محمد الشريف يكتب: التدخين والحمل
بيسألني كثير من الحوامل علي التدخين في الحمل سواء كانوا هما المدخنين او التدخين السلبي. أنا عارف إن التدخين أصبح ظاهرة بين الشباب من الجنسين، وده بيخلي مشكلة التدخين في الحمل تظهر وللأسف لحساسية الموضوع محدش بيتكلم عنه.. انا هاكلمك عن الموضوع الشائك.
ممكن ادخن في الحمل؟
ده اول سؤال بتسأله اي مدخنة.. الأجابة، قطعاً لا.
أنا هاستشهد بكلام بروفيسور Robert Welch ، كان بيقول” انه لو ممكن أي مدخنة تستبدل التدخين في الحمل بأي سبب تاني يضر الجنين زي الضغط والسكر ، هيكون أفضل لها وللبيبي، لأن الأمراض دي ممكن علاجها في الحمل ولكن اثار التدخين علي الحامل والجنين لا علاج لها”
خطر التدخين في الحمل؟
مبدئياً، السيجارة فيها اكثر من ٤٠٠٠ مادة كيميائية، بِمَا فيهم الرصاص والزرنيخ! وعلي الأقل ٦٠ مادة كيميائية مسببة لسرطان الرئة. حضرتك لما بتدخني، المواد دي بتمتص في الدم بنِسَب متفاوتة ، ومصدر طفلك الوحيد للأوكسوجين والغذاء هو الدم. وطبعاً ، مفيش اي مادة من المواد ال٤٠٠٠ دي مفيدة للجنين، ولكن منهم بالأخص مادتين شديدة الخطورة علي الجنين. النيكوتين وأول أوكسيد الكاربون . المادتين دول يسيبوا معظم مشاكل التدخين المرتبطة بالحمل . وأخطرها الوفاة داخل الرحم ، ونقص وزن الجنين. لان النيكوتين يقلل الاوكسوجين الي يصل للجنين لأنه يسبب انقباض للشرايين اللي في جسمك، وكمان أول أوكسيد الكاربون بيتحد بالأماكن اللي موجودة للأوكسجين في كرات الدم الحمراء. يعني بيقلل فرص نقل الاوكسوجين في نفس الوقت مع تدييق الشرايين!!
إزاي التدخين هيأثر علي الجنين؟
لازم تعرفي ان التدخين حتي لو نسبة قليلة، هيأثر علي نسبة الاوكسوجين اللي هتوصل البيبي، وبالتالي هتأثر علي وزن البيبي. فرص ولادة طفل قليل الوزن ( أقل من ٢.٥ كيلو) بتتضاعف!! وكمان فرص الوفاة داخل الرحم بتزيد ٣ مرات!!.
الأضرار ايه؟
١- نقص وزن وحجم الجنين.
٢- نقص نضوج الرئتين لدي الطفل حديث الولادة. في الغالب، نقص الوزن والنمو بيزود فرص احتياجه للحضانة والتنفس الصناعي، وكمان الاثار الممتدة للنيكوتين علي الرئة إن الطفل بيكون أكثر عرضة للحساسية والربو الشعبي فترة الطفولة والكبر. وأيضاً بيرفع فرص الوفاة المفاجئة للجنين “Sudden infant death syndrome “
٣-مشاكل وتشوهات القلب لدي الجنين. الأطفال اللي امهاتهم كانت كانوا بيدخنوا اول ٢ اشهر في الحمل، اكثر عرضة لمشاكل القلب . فرص تشوهات القلب اكثر من ٢٠-٧٠٪ من نظائرهم الآي امهاتهم غير مدخنين. من التشوهات بالقلب الشهيرة بسبي التدخين في الحمل ASD “ثقب بالقلب” ، وضيق الشرايين Right ventricular outflow tract.
٤- وظائف المخ، تتأثر كل من نسبة الذكاء لدي الطفل، التركيزأيضا التحصيل الدراسي.
أنا بأدخن أعمل ايه؟
أولا، لو بتدخني وبتخطيط تحملي، الافضل توقفي تدخين قبل الحمل ب٣ أشهر. ده هيزود فرص الحمل ب٤٠٪، وكمان هيخاي الحمل أصح.
ثانيا ، لو بتدخني في اول ٣ أشهر، وقفتي تدخين ، فرص الحصول علي جنين سليم بتزيد.
ثالثاً لو بتدخني حتي ١٦ أسبوع بالحمل لازم أبلغي الدكتور بتاعك وموقفي، لان المشاكل بتكون بدأت بنسبة ٧٠٪.
د.محمد الشريف
استشاري أمراض النساء والتوليد
