طبيب يستغيث بعد إصابته بكورونا.. “طاقتي بتخلص وجسمي اتهد”
أثار الدكتور مصطفى السيد عبده، طبيب القلب بمركز القلب في المحلة، موجة من التعاطف، بعد أن استغاث على صفحته بمنشور بسبب سوء حالته الصحية، بعد إصابته بفيروس كورونا المستجد.
قال الدكتور مصطفى في منشوره: طاقتي بتخلص وجسمي اتهد حرفيا ونفسيتي قربت تنهار تماما.. مش مصبرني غير وعد ربنا بالكرم من عنده”، وبعد دخوله العناية المركزة كتب: “يا رب علشان خاطر البنتين الغلابة اللي مالحقتش أحفظ وشوشهم بسبب الجري في الدنيا”.
وأضاف:”المشكلة في الوقت اللي مش بيمر.. الدقيقة بتمر ستين سنة مش ستين ثانية.. ويا ريتها بتمر.. ولما بتمر ما بتبقاش عارف الدقيقة اللي بعدها هتحصلها وتمر ولا إيه هيحصل.. وما بتبقاش عارف الوقت ده كده في مصلحتك ولا بيلعب بذكاء ضدك.. أنا مش قادر فعليا ومرهق خلاص… ادعوا لي”.
وتابع:”كفاية الرئة مفيش فيها هواء يفتحها.. كفاية القلب مع كل حركة أو لحظة تفكير ضرباته تقفز من خمسين لحد 130.. كفاية يبقى في حاجة بتسد القصبة الهوائية وأنت حاسسها لكن جهاز التنفس اللي قايم بالمهمة مكانك مش حاسس بيها وضغط قصاد ضغط والصدر عاوز ينفجر.. مش مهم أي أعراض.
كان المنشور الأول للطبيب، عبر صفحته الشخصية عبر “فيس بوك”، في 26 أغسطس، قال فيه: “نهجان شديد وصعوبة في التنفس.. معدل أكسجين بينقص.. ودرجة حرارة ما بتنزلش.. والجسم كله مكسر.. وكحة شديدة.. وحرب علشان النفس يدخل وحرب اصعب علشان النفس يخرج.. ودي كلها اسمها أعراض تنفسية بسيطة.. على كده سكرات الموت بتبقى عاملة إزاي؟!
وأصيب الدكتور مصطفى السيد عبده، بفيروس كورونا، وازدادت حالته سوءًا يوم بعد الآخر، حتى دخل العناية المركزة بعد أن تدهورت حالته.
