مساعد وزير الصحة الأسبق يقدم نصائح هامة لتخزين اللحوم
بعد ما تدبح وتقرر توزع لحمة الاضحية ..وتيجي لحظة التخزين بالتلاجات خلي بالك ..اوعي تخزن في الفريزر او الديب فريزر علي طول
اوعي تفكر تكيس اللحمة وهي لسة مدبوحة وقبل ما تبرد
علي الاقل بعد ٥ ساعات ..من الدبح والتقطيع ليه تعالي اقولك بعد الدبح بيحصل حاجة كدا اسمها
التيبس الرمي
دي أول تغيير بيحصل للحمه بعد ذبح الحيوان
وبتكون عباره عن مجموعه تفاعلات ارادية بتحصل للحمة وبتبدا بانقباض للحمه
واستنفاذ لكل👈 انزيمات الأكسده ويبدا يتكون حمض اللاكتيك اللي بيتنج من تكسير الجليكوجين اللي هو مهم جدا
ليه عمليه التيبس الرمي دي مهمه جدا جدا👈
👋 لان تكون حمض اللاكتيك ده بيلعب دور مهم جدا في حفظ اللحمه لمده اطول وكمان طزاجة اللحمة طول فترة التخزين
👏اللحمه بتبدا تكون أطرى وأكثر استساغه معانا لان عمليه التيبس الرمي دي بتعمل عندنا عمليه Ripening للحمه أكتر يعني بتخليها طريه جدا عن طريق تحويل لكل الانسجة الخشنة والصعبة الهضم لانسجة اطري والذ
-كمان لو حبيت احول اللحمه دي لمنتجات اخري تحتاج نسب ملح عالية مثلا فحمض اللاكتيك اللي نتج من التيبس الرمي ده بيساعد اكتر في اختراق الملح لنسيج اللحمه
خلي بالك لو دبحت الحيوان بتاعك وهو مجهد او جاي من سفر مثلا فدا من العوامل اللي بتأثر جدا علي عمليه التيبس الرمي ده لانه بيؤدي الى تيبس رمي ضعيف عشان كده مهم جدا الحيوان اللي هدبحه اقلل من عليه الاجهاد والتعب وبالتالي بحاول اهدية قبل الدبح بحوال١٢ ساعه وبدون اكل لكن اشربه كتير بحيث ما أثرش على جوده اللحمه
👏-طبعا من اهم مميزات العمليه دي انها بتمنع عندي نمو الميكروبات طول ما اللحمه في مرحله التيبس الرمي نتيجه للوسط الحامضي ده واللي بيقتل الميكروبات
عشان كده مهم جدا جدا اول ما الحيوان يندبح مش نطبخ لحمته على طول وإلا هيكون لحمته مش مستساغه لأنها هتكون مدخلتش لسه في مرحله التيبس الرمي
مهم جدا اللحمه وهي لسه مدبوحه ولسه بسخونه دبحها دي محطهاش في الفريزر لان كده هقطع عمليه التيبس الرمي. وهاسمح بنمو بكتيريا وفطريات. كتير وهتبقي فيه ريحة عفنه ومقززة
يعني لما اللحمة تندبح لا اجمدها ولا اطبخها الا بعد مرور علي الاقل خمس ساعات .اسيب اللحم بعد الدبح في الهوا ومكان طراوة ونضيف واحاول اشطف الدبيحة ..وبعدين هنقطع ..وبعدها افرشها علي مثلا ترابيزات نظيفة بحيث تبرد وتنشف من اي ماية او دم واضمن كمان ان عملية التيبس تتم صح واكل لحم نضيف ..بعد كدا هتكيسها في اكيلس نظيفة وترصها في الفريزر بس سيب فراغات بين الاكياس مش علي بعض . ونفس الوقت اللحم اللي فيه دهون نخليه فوق عشان استخدم الاول ..لما اطلع كيس لحمة اسيبه قبل الطبخ بيوم يفك علي رف التلاجة عشان فايدتها ما تروحش ..لو مستعجلين ع الطبخ افتح الحنفيه علي كيس اللحمة نص ساعه وبعدين اطبخ بس والكيس مقفول ..عشان بس اللحم يفك شوية
شوف الفرق في الصورتين بين اللحمة النظيفة والحمة اللي خزنتها علي طول بعد الدبح ..تلاقيها غامة ومش حلوة
الدكتور نصر السيد
مساعد وزير الصحة الأسبق للطب الوقائى
