“عبيد” خلال تقديم أوراق ترشحه للإنتخابات: ترشحت لإكمل مسيرتي المهنية

قال الدكتور محي عبيد نقيب الصيادلة، خلال تقديم ورق ترشحه اليوم علي مقعد نقيب الصيادلة بالنقابه العامه، “النهاردة بكل صدق  وشفافية عن الأمانة اللى حملتوهانى خلال ال 4 سنوات اللى فاتوا.. انا جيت باختياركم واتحملت المسئولية، وبفضل الله وبفضلم، حققنا حاجات كتير، اشتغلنا بجد وامانة وما يزال أمامنا  الكتير عشان نحققه، بدأنا في تنفيذ عدد من أحلامنا المؤجلة، اللى كانت بعيدة اوى اننا نحققها، وقائمة الإنجازات المحققة تكفي أي نقيب لكي يفخر بما حققه في خلال ال 4 سنوات الماضية.. من توصيف وهامش ربح وتكليف صيادلة ونوادى وزيادة المعاش، حاجات تليق بصيادلة مصر ونسيبها الى جاى بعدنا”.

وأضاف “واجهنا شائعات كتيره كانت كفليه ان تهدم الكيان النقابى بالكامل، ولكن بفضل الله وفضلكم، قدرنا نتصدى لها، بالعمل الجاد والمتواصل.. وعندما رشحت نفسي من 4 سنين كنت داخل معنديش فكره عن كل حاجه، لكن هل كان عندنا تحديات .. ايوه كان طبيعى عندنا تحديات ومشاكل، لكن بذلنا كل جهدنا عشان نحل هذه المشاكل وربنا شاهد علينا.. مين كان يحلم أن يكون عندنا صيدلى مدير أو رئيس هيئة تأمين أو يكون عندنا تخصصات اخصائي واستشارى”.

ويقول “عبيد” حول قراره بالترشخ في الانتخابات الجارية، “أنا لما جيت أرشح نفسي المره دى، استخرت ربنا، قررت أن ارشح نفسي مش عشان عايز منصب ولا عايز كرسي، او اى حاجه تانية، لكن عشان عايز أخدم زملائي وبيتنا النقابى اللى احنا منتمين له، ونكمل المشوار وتحافظ على حقوق وكرامة الصيادلة، وعشان نكمل التوصيف الوظيفي والهيئة العليا للدواء، وزيادة المعاش مره اخرى والاستمرار فى ألفاظ على تكليف الزملاء، نحافظ على صيدليات مصر وتكون الصيادلة وليس للدخلاء، وايضا زيادة هامش الربح والاكسبير ونكمل اتفاقينا مع حماية المستهلك..أنا منتظركم  وواثق فى جموع صيادلة مصر واختياركم..  عشان نكمل الشغل اللى احنا بدأناه مع بعض”.

اتمنى أن يكون يوم الانتخابات عُرس ديمقراطى، انزلوا عبروا عن رايكم واختاروا من يمثلكم.. واكيد طول ما ايدينا فى بعض هنحقق كل أحلامنا.