موظفو التأمين الصحى يهينون طبيبة صدر اشتباه كورونا .. مش ناقصين قرف
“جيش مصر الأبيض” يبدو أن تلك الجملة ليس لها حظ سوى في الترديد الإعلامي أو كما يقال “الصيت ولا الغنى” لكن على أرض الواقع يواجه الأطباء تحديات عديدة ليس فقط على مستوى المنظومة الطبية، والتي زادت وطأتها مع أزمة فيروس كورونا المستجد.
أصبح الأطباء في يومنا هذا ينقسمون ما بين شهيد وطبيب يمارس واجبه داخل أحد المستشفيات أو آخر مصاب بلعنة كورونا، لتضيق الحياة عليهم أكثر في ظل ما يلقونه من سوء معاملة.
“الدكتورة منى استشاري صدر بمستشفى صدر العباسية” ترصد مأساة يعيشها الكثير منا من سوء معاملة من بعض موظفي التأمين الصحي”.
تروى د.منى قصتها قائلة:”انهاردة رحت التأمين الصحي بمدينة نصر لاستكمال إجراءات الإجازة المرضي بعد خروجي من مستشفى الصدر اليوم، حيث كنت محجوزة بأعراض اشتباه إصابة بفيروس كورونا أنا وزوجي، وكانت مسحة زوجي إيجابيه ومسحتي سلبية، وبعد اسبوع تم عمل خروج لي اليوم، مع استكمال فترة العزل المنزلي الموصي بها”.
يبدو أن كورونا وسوء معاملة بعض موظفي التأمين الصحي اتفقوا على د.”منى” ليحاوطوها بضغط نفسي وعصبي لا مثيل له بدلًا من أن تلقى الرعاية الكاملة وحسن المعاملة لتستكمل رحلة معاناتها قائلة:” رحت معايا صورة البطاقة الشخصية وصورة بطاقه التأمين الصحي وجواب الخروج من المستشفي، الموظف في التأمين رجعني المستشفى عشان أجيب جواب تحويل من المستشفي، رحت جبت الجواب ورجعتله تاني الساعة 12 ونص قالي ادخلي لـدكتورة نهي”.
وتسطرد أحد أفراد جيشنا الأبيض قائلة:”دخلت للدكتورة قلتلها أني روحت ورجعت عشان كده اتاخرت وأنا تعبانة ولسه خارجة اليوم من المستشفي سألت عالاشعات وطلبت مني تصويرها وبعد محايلات مني وزعيق منها (أنا مالي انتي اللي جاية بورقك مش كامل) نزلت صورت الاشعات ودخلتلها تاني”.
وتستمر الموظفة في تعنت لا مثيل له لتبلغاهل:”خلاص ابعتي حد ياخد الاجازة بكرة.. قلتلها حضرتك كده الاجازة كام يوم لأني محجوزة فالمستشفي أسبوع.. زعقت بصوت عالي يالا يا ماما ده إجازة العزل كلها من 10 لـ 14 يوم.. قلتلها ما أنا عارفه وأنا اتحجزت اسبوع فالمستشفي.. قالتي طب يالا يا ماما خلصيني”.
أخيرًا قررت د.منى الخروج عن صمتها قائلة:” قلتلها يا دكتورة هو حضرتك بتزعقي كده ليه كلميني بالراحه انا زميلة واستشاري فالمستشفي قالتلي مش عجبك طب ادي ورقك مش هقبله وتعالي بكرة تاني اعمليه..خرجت قلت اقابل المدير المسئول وجهوني لدكتورة إيناس مديرة اللجنة.. أول مادخلت بعرفها بنفسي انا د.مني استشاري صدر فمستشفي صدر العباسية.. لقيتها بتشوحلي بايديها عشان أبعد وتقولي طب روحي بعيد خليكي عند الباب.. الواحد مش ناقص قرف”.
وتستكمل:”الكلمة صدمتني ودموعي كانت هتنزل وقلتلها انا يا دكتورة قرف ؟؟؟.. ردت لاء قرف الكورونا.. قلتلها ان الدكتورة نهي بعد ما كتبت الاجازة رجعت الورق وقالتلي تعالي تاني بكرة.. فوجهتني للموظفة وطلبت انها تكلمها تعرف ايه اللي حصل.. وبعد 5 دقايق جالي الرد من الموظفة تعالي بكرة عشان تتعرضي تاني علي اللجنة.
تتساءل د.منى:” مش عارفه مين الكبير المسئول اللي ممكن يحاسب الناس دي. معرفش لو شيرتو كلامي ده هيوصل للمسئول الكبير في التأمين الصحي وحد هيحاسب الناس دي ولا لاء.. بس مفيش حاجه اقدر اعملها غير كده واقول حسبي الله ونعم الوكيل فيهم”.
لتترك السؤال مفتوح لمسئولي التأمين الصحي الذين يجب أن يتخذوا موقف صارم أمام كل موظف تسول له نفسه أن ينتهك كرامة المواطن بعيدًا عن مؤهله أو وظيفته”.
