نقيب الأطباء: “التدريب أولى من العلاج.. ولازم المستوي الفني والأخلاقي يتحسن” (حوار)
دكتور نيوز
أجرت شبكة the insider الطلابية النشاطية غير الرسمية بكلية طب قصر العيني جامعة القاهرة، حوارًا قصيرًا مع الدكتور حسين خيري، نقيب الأطباء الحالي، وعميد الكلية السابق، على هامش إحدى المحاضرات.
ويعد حسين خيري أول عميد منتخب للكلية بعد ثورة 25 يناير، الذي يُعرف عنه أنه الجراح الوحيد في القصر العيني الذي ليس له عيادة خاصة، ولا يعمل في مستشفى خاص، كما أنه ليس له زوجة ولا أولاد، فقد تزوج كلية طب القاهرة وتبنى أطباءها وطلابها؛ فلقبوه بـ”راهب القصر العيني”، كما يشهد له أنه أستاذ الجراحة الوحيد الذي يتولى الشرح يومياً بدون مقابل على مدار ربع قرن.. وإلى نص الحوار
فى البداية.. كيف ترى حسين من داخلك؟
أنا ببساطة، أستاذ جراحة الأوعية الدموية بكلية القصر العيني، وده اللي أنا شايفه، بحب أشوف نفسي إنسان قبل أي حاجة تانية، وبحاول أبقى كده، ده منظوري الأساسي للبني آدمين كلهم، إنهم لازم يتمتعوا بإنسانيتهم الأول، بغض النظر عن تفوقهم المهني.
كيف استطعت تحويل الطب من حاجة صعبة ومعقدة لحاجة ممتعة؟ وكيف استطعت أن تمتع الطلاب بمثل هذا؟
كل ما ذكرتموه أقوم عليه بتمتع من نفسي، لما الواحد يشوف حد لسه بيبتدي وبعد كده بيكبر خطوة بخطوة، وبعدين يشوفه بيكبر أوي، وزي مابيقولوا أسرع طريقة الواحد يبقى بيها مبسوط هي إنه يبسط الناس اللي حواليه، ملهاش تبرير معين، بحس إن أنا بعمل حاجة بتفرق مع الناس، كل مالواحد يبقى “conditioned” إنه بيعمل حاجة بتبسط، تلاقيه عايز يعملها أكتر وأكتر زي الناس اللى بتعمل الحاجات الوحشة بس بطريقة مختلفة.
ما هى رسالتك كنقيب للأطباء؟ وبمعنى آخر ما الهدف الذي تريد أن تصل إليه خلال الفترة الأخيرة؟
أهم حاجة عايز أوصلها هي إن الطبيب يبقى على مستوى فني وتقني أعلى من اللي إحنا عليه، أهم حاجة نعملها إننا نحسن تدريب الأطباء؛ لما يكونوا على مستوى مهني وتقني أحسن تبص تلاقي كل المشاكل اللي اتكلمنا عنها اتحلت، بالذات نظرة المجتمع، هو ليه نظرة المجتمع لينا مش كويسة؟ عشان احنا مش على المستوى، لازم نبقى أحسن شوية فى كل المستويات، المهني والإنساني والأخلاقي.
وكيف ترى مستوى الأطباء والطب في مصر وما هى أدوات تقويمه؟
مستوى الطبيب والطب كما ذكرت مسبقًا، والموضوع يمتثل في ضرورة أن يكون لدينا مدربين حقيقيين يبقى هدفهم هو التدريب؛ لإن احنا كتير أوي مش بيبقى ده هدفنا، بيكون هدفنا العلاج وكده مبنوصلش للى احنا عايزينه، بناخد التدريب كهدف ثانوي، التدريب لازم يبقى هدف أولى، آه هدفنا إن العيان لازم نعالجه دى مش عايزه كلام، بس الثانوي يبقى العلاج والأولى يبقى التدريب، وتفرق أوي الحكاية دي.
اذكر طلبًا تطلبه من الطلاب.. وقدم نصيحة لهم؟
“عليكم مسئولية كبيرة أوي، الموضوع مش إنكوا بتذاكروا عشان عليكوا امتحان، الموضوع إنكم بتذاكروا عشان تبقوا أطباء متميزين بتقدموا خدمة للمجتمع وبترفعوا مستوى المهنة، فانتوا لازم تشتغلوا بالفكرة دى، آه دى بتترجم لدروس وكتب وامتحانات بس لازم يبقى هدفها اللي ورا كده انكوا لازم تقوموا وتنضموا، مشروعنا كلنا إننا نعمل مهنة أفضل ومنظومة صحية أحسن”.
وهبت حياتك كلها للطب.. هل لقيت العائد من ده اللي كنت متوقعه؟
“نعم.. العائد كبير أوي ماشاء الله يعني”.
لماذا اخترت حياة بعيدة عن الحياة التقليدية؟
يمكن في أسباب مش هقدر أقولها، لكن خلينا في الأسباب العادية، ليها عائد كبير أوي يعني وبحمد ربنا عليه سبحانه وتعالى.
ما هى أكبر خطوة تننوى لها بعد منصب نقيب الأطباء لتختم بيها مسيرتك؟
لا أعرف حاليًا، أنا بقعد أفكر في الكلام ده كتير لكن مش عارف، منتظر من ربنا -سبحانه وتعالى- ينعم عليا بحاجة بس مش عارف هى إيه، وربنا يسهل.
